Facebook компани Clubhouse-тай төстэй аудио-чат өрөөг бүтээж байна гэж NYTimes мэдээллээ. Аль нэг сэдвийн хүрээнд өрөө нээн текст бичилгүйгээр харилцан ярьж, түүнийгээ бусдад сонсгож болдог Clubhouse аппликейшны нэр хүнд сүүлийн үед олон нийтийн дунд эрчээ аваад байгаа юм.
Facebook-ийн удирдлагууд холбогдох ажилтнууддаа Clubhouse-тай төстэй өрөө бүтээхийг даалгасан бөгөөд төслийн ажил эхэн шатандаа явж байгаа аж.
Тус компанийн хэвлэлийн төлөөлөгч Эмили Хаскел өмнө нь "Компани олон жилийн турш хүмүүсийг аудио болон видео технологиор холбож ирсэн. Цаашдаа ч үүнийг улам сайжруулах арга замыг эрэлхийлсээр байх болно" хэмээж байсан юм.
Facebook бусад компаниудын адил шинэ гарсан шилдэг технологийг чадвал хуулбарлахыг хүсдэг. Жишээ нь Snapchat-тай адил Stories, TikTok-той ижил Reels, Zoom-тэй төстэй Room зэргийг маш хурдан хугацаанд бүтээсэн.
Эсвэл шинийг бүтээхийн оронд өөрийн болгосон түүх ч цөөнгүй. Тэд зураг хуваалцдаг Instagram, зурвас харилцааны WhatsApp, виртуал бодит байдлыг бүтээдэг Oculus компаниудыг гарч ирээд удаагүй байхад нь худалдаж авсан билээ.
Эх сурвалж: gogo.mn
