МТ-ийн инженерийн шалгалтын сургагч багш бэлтгэх “Сүүлийн үеийн трэнд технологийн чиг хандлага” сэдэвт сургалт зохион байгуулагдана.

Мэдээлэл, технологийн үндэсний парк (МТҮП) нь Япон улсын Гадаадтай үүсгэх техникийн хамтын ажиллагааны нийгэмлэг/AOTS/-тэй хамтран “Мэдээллийн технологийн инженерийн шалгалтын сургагч багш бэлтгэх” хөтөлбөрийг анх 2007 оноос хэрэгжүүлж эхэлсэн билээ. 

Энэхүү хөтөлбөрөөр МТ-ийн инженерийн шалгалтанд бэлтгэхэд шаардлагатай сургагч багш нарыг бэлтгэх зорилготой бөгөөд нийт 4 удаагийн сургалтанд 90 гаруй багш, мэргэжилтнүүдийг хамруулж гэрчилгээ олгоод байна.

Энэ удаад Монголд улсад 5 дахь удаагаа “Сүүлийн үеийн трэнд технологийн чиг хандлага” сэдвийн хүрээнд МТ-ийн инженерийн шалгалтын агуулгад шинээр орж буй технологиудын талаар AOTS-ийн сургагч багш нар онлайнаар холбогдон заах юм.

Сургалтанд Улаанбаатар хот болон хөдөө орон нутгаас оролцох боломжтой бөгөөд МТ-ийн инженерийн шалгалтанд тэнцсэн эсвэл цаашид сургагч багшаар ажиллах сонирхолтой 30 оролцогчид үнэ төлбөргүй суралцах эрхийг олгож байгаа юм. 

Сургалтанд хамрагдсанаар:

  1. Сүүлийн үеийн технологийн талаар мэдлэгийн түвшингээ дээшлүүлнэ.

  2. Байгууллагын МТ-ийн сургалтын зардлыг хэмнэнэ.

  3. Байгууллага өөрөө ОУ-ын сургагч багшийн гэрчилгээтэй ажилтантай болно.

Сургалт нь 2 ээлжээр 10 хоногийн турш үргэлжлэх бөгөөд нэгдүгээр ээлж 2020 оны 11 сарын 30- аас 12 сарын 04, хоёрдугаар ээлж 12 сарын 07-11-ний хооронд МТҮП дээр зохион байгуулагдана.

Нэг байгууллагаас 3 хүртэлх суралцагч хамрагдах боломжтой тул шаардлага хангасан оролцогчид suvd@itpark.mn цахим шуудангаар хүсэлтээ илгээх бөгөөд дэлгэрэнгүй мэдээллийг 9987-3748 дугаараас лавлана уу.